НАИБ ГЬАСАНАЗ

Эй адалат, вели Султан,
Эй играми Гьасан наиб,
Эй фелек сагьиби мяден,
Эй алама игьсан, наиб,

Ви стхаяр хьайт1а риза,
Са гьикая ахъайин за.
Кьилел атай дуьшуьш-къаза
Дуьз риваят хъсан, наиб.

Хабар аш я, эвел тайин,
Дуьз хьайивал за ахъайин,
Гьакимариз хьана хаин,
Куьре хьайвал масан, наиб.

Эвел фасикь-яхулару
Ч1урна къеле, еке пару,
Мийир лугьур са кас дугъру
Хьанач, гьич са инсан, наиб.

Бунтар авун хьана еке,
Ч1ур хьана хьи гьар са уьлкве.
Атана чал еке леке
Хьанач игьсан, лисан, наиб,

Рекьера гьатна чапарар,
Акъудна еке хабарар,
Дуьзмиш авур кьван тапарар,
Дуьшуьшкарар лисан, наиб.

Аваздалда хана Куьре,
Яхуларни атай бере,
Къуьнел алаз къалуз дегьре
Тунач чи руьгь-раван, наиб.

Хьанач жаваб ийир са кьил,
Ви гьарайдихъ агакьнач гъил, —
Цав кьакьан яз, к1еви яз ччил,
Жагъанач фир макан, наиб.

Дели къудуц1 хьана юлдаш,
Фугъараяр ийиз тараш,
Хьана уьлкве алаш-булаш,
Гьатна сад агьу-фугъан, наиб.

Гьар са угъриди, игриди,
Тунач сефилди, дугъриди,
Малд иес хьана дириди,
Шеръ авачиз я диван, наиб.

Хупарламиш хьана эллер,
Буьтуьн далда хьана чуьллер,
Чир хьайила, хана эллер
Течиз гьисаб я сан, наиб,

Вирибуруз хьана зарар,
Хиве гьатна еке ппарар,
Низамдивди хилафарар,
Хьана агьур-залан, наиб.

Гьакимариз атана хъел
Дугъри, игри тунач хьи эл,
Къурмиш хьана атана сел,
Акъатна хьи т!урфан, наиб.

Бязибуруз хьана хелвет,
Бязибуруз гъам-хажалат,
Бязибуруз хьана гьелбет
Къизил кьифран макан, наиб.

Бязибуруз хьана даягъ,
Бязибуруз хьана дустагъ,
Бязибурун вилеллаз нагъв
Хьана тегьер хазан, наиб.

Бязибурун хьана бейгьал,
Бязибурун тарашна мал,
Бязибурун ч1ур хьана к1вал,
Гур кас (а) вачиз фарман, наиб.

Бязибур туьнбуьгь ийиз гатаз,
Бязибурув хиве кьаз таз,
Бязибуру хифет ч1угваз
Хьана хата-зиян, наиб.

Этим Эмин са бейчара,
Хифет ч1угваз хьана пара.
Хьана Мажнум хьиз фукъара
Амукьна бейниван, наиб.

Етим Эмин