АЛКЬВАДАР ГЬАСАН ЭФЕНДИ

Терг хьана хьи илимдин гьуьл
Алатна чи Куьредин кьил.
Ат1удач валлагь вахъай вил,
Алкьвадар Гьасан эфенди

Хкахьна уьлкведин чирагъ,
Ик1 бегьерлу майвадин багъ.
Женнетда ваз расна утагъ,
Алкьвадар Гьасан эфенди.

Ви гьуьжреяр хьана к1еви,
Чк1ана сухтаяр вири.
Фирдавустда хьуп ваз ери,
Алкьвадар Гьасан эфенди.

Ик1 халкьариз шариат из,
Гьар са кар на ийида дуьз
Гьайифди я вун гьаниз физ
Алкьвадар Гьасан эфенди.

Ви сухтаяр хьана ажиз
Тарсар гудай кас амачиз.
Вахт тахьанмаз фей рагьметдиз,
Алкьвадар Гьасан эфенди.

На гай илим хьана ширин,
Вун Аллагьди авуй дерин,
Ви жасаддиз хьуй аферин,
Алкьвадар Гьасан эфенди.

Вахъ ишехьда цавар чилер,
Чидайбурун – ясда рик1ер,
Накъварив ац1анва вилер,
Алкьвадар Гьасан эфенди.

Вун хьтин кас къежгъич чаз мад,
Амукьда дуьньяда ви ад,
Вун халкь авур Аллагь я сад,
Алкьвадар Гьасан эфенди.

Хьана валлагь вун мусаниф,
Чаз ктабар авур тесниф,
Дуьньядай физ тир вун гьайиф,
Алкьвадар Гьасан эфенди.

Алим амач мад Куьреда,
Акьуллуяр вири шехьда,
Ктабарни зая жеда,
Алкьвадар Гьасан эфенди.

На халкьариз сагьибна тарс,
Вав барабар хъижеч мад кас,
Вун кьейила хьана чаз яс,
Алкьвадар Гьасан эфенди.

Ви килфетар хьана ажиз,
Хиял ч1угваз, фикир ийиз,
Мугьман хьайи а дуьньядиз,
Алкьвадар Гьасан эфенди.

Аферин вун хай дидедиз,
Раижна миллет дуьньядиз,
Т1вар туна чаз, эл-тарихдиз,
Алкьвадар Гьасан эфенди.

Истамбулда авай ви т1вар,
Къазандани ваз муьруьдар,
Аян жедай ваз гьар са кар,
Алкьвадар Гьасан эфенди.

Хпеж Къурбана лугьун квез,
Гьарам-гьалал талгьуз ик1 нез,
Мусурманар ава вахъ шез,
Алкьвадар Гьасан эфенди

Хпедж Курбан